Simon Li 沙嗲牛肉
👍🏻😋完美分享 ~🔥🌶️ 🧅🥜🐮超水準茶餐廳沙爹牛肉製作，大家可以試下我呢個沙爹牛肉食譜，我對呢個食譜非常有信心，製成品唔會接近茶餐廳，而係超越好多嘅茶餐廳，試過一定返唔到轉頭，材料準備都唔會太複雜，成功率非常之高。 選擇牛肉：首先講下牛肉部位，如果係餐廳嘅話因為成本關係，理論上都係用一啲急凍牛肉比較平價嘅部位再用鬆肉粉去乸佢，但屋企自己製作的話，就可以根據自己喜好揀鍾意嘅部位，其實任何部位都可以的，一般用牛冧肉都唔錯，鍾意嘅話牛腩、西冷、牛柳甚至牛脷都可以，再唔係整個牛肉大雜錦都得，最緊要跟番肉嘅部位切到適當嘅厚薄，同埋唔建議用太肥嘅牛肉，因為煮完油份流失就會散哂，我就比較鍾意帶些少筋位置會比較有口感。 處理牛肉：我呢個沙爹牛肉係餐廳嘅做法，味精鬆肉粉都不能少，牛肉切好成適當嘅厚薄，跟返一般醃牛肉嘅調味料去醃一下，豉油、糖、雞粉、胡椒粉、蠔油、料酒、生粉，另外加少量嘅鬆肉粉或者梳打粉，份量睇返牛肉部位，又韌又硬嘅部位就落多啲，就算用軟淋嘅牛柳都點要落些少，最緊要落返些少味精先有餐廳味道，醃牛肉嘅時候要加水一齊醃，一路攪拌一路加水就會見到牛肉非常索水，見到牛肉發漲就可以，緊記醃牛肉唔可以落鹽，否則會令牛肉脫水肉質變硬。 靈魂沙嗲醬製作：蒜頭、乾蔥頭、炸花生、油蔥酥、全部放哂入攪拌機打碎佢，沙爹醬、沙茶醬、花生醬，用適量嘅油將所有沙嗲汁材料調味料一齊炒出香氣，然後加些少咖哩粉提高香味，鍾意辣嘅可以加辣椒同埋辣椒油，跟住加入適量嘅水，再加糖雞粉味精豉油等調味料煮出香氣，調教好味道就可以準備整沙爹牛肉。 製作：一般醃牛肉落咗梳打粉嘅話都要幾個鐘頭先可以令到纖維變軟，醃好嘅牛肉可以選擇走油或猛火炒熟，炒好嘅牛肉放入筲箕將多餘嘅水份隔走，之後就放入沙嗲汁煮滾同埋再次試味，因為牛肉已經有生粉醃過唔需要再打芡，如果沙嗲汁唔夠杰先再用生粉水打多一次芡，煮好嘅沙爹牛肉冚蓋放幾個鐘俾啲時間佢入味，超級美味嘅沙爹牛肉就完成。 又味精又雞粉又鬆肉粉？冇錯，我做嘅係餐廳味道，如果覺得唔健康嘅話出餐廳食都一樣係唔健康。靈魂沙嗲汁調味料一定要有炸乾蔥頭同埋沙茶醬，煮沙嗲汁嘅時候唔需要太重味道，因為牛肉都有醃料，煮嘅時候會溶咗落沙嗲汁，如果太鹹的話溝水就會令到沙爹醬變淡，落咗牛肉去煮之後唔夠味道先再額外加調味，係咪覺得好吸引呢，大家拿拿聲整呢個神級沙爹牛肉，最適合用嚟整沙爹牛肉撈公...
