邊食邊煮 大排檔風味豆豉醬

大排檔風味豆豉醬 ~

豆豉簡單浸一下，

大約相同份量嘅濕蒜，

少量薑蓉，

要有強烈嘅香味就要加一啲乾蒜粒，都係浸一浸水等佢變軟，

另一種好重要嘅香味來源就係炸洋蔥或者乾蔥，

所有嘢好簡單咁掉曬落攪拌機加啲油一齊打碎曬佢，

鍾意辣味可以加些少豆瓣醬或者辣椒油，

所有嘢搞碎曬之後放落鑊中火快手炒香佢，建議用易潔鑊唔黐底，

炒嘅時候加返一啲糖同埋蠔油，加糖可以增加焦香味同埋增加黏性，炒出嚟更加似醬料，蠔油可以令味道更有層次，記得唔好炒太耐同埋要快手兜炒，

因為豆豉係黑色嘅，炒燶咗係睇唔到的，基本上只係令佢揮發一啲水份咁樣就可以襟擺啲，炒好之後要離鑊盡快畀佢攤凍，如果keep住有溫度嘅話香味就會流失，攤凍之後就可以入樽了。

一般油份完全冚到豆豉醬嘅面就可以，冚唔曬就再加些少食油封面，因為冇加防腐劑的，所以必須雪櫃儲存，放三個月到半年都冇問題的，夠凍嘅話放一年都唔變壞。

呢個係超級萬用豆豉醬，用法可以用嚟炒蜆，豉椒炒嘅菜式，豉汁蒸排骨都可以用到，做蒸嘅菜式可以直接用嚟撈材料，豉椒炒嘅菜式就先將豆豉醬爆一下，嗰種香味就係同大排檔嘅一模一樣，整一樽豆豉醬成本都唔需要幾蚊就大大樽了，建議整嘅份量多一啲比較容易控制，整多咗就同朋友一齊分享啦。。。。。