MamaCoachHongKong: 默書

［親子教養事件薄- 默書］

「你k3 就識寫個「於」字，點解到五年班仲唔記得？」教Parenting 的我明知道上面這句説話是一個roadblock （溝通絆腳石）， 會窒礙溝通，但我氣在上頭，已經衝口而出收不住了！

出事啦！個仔馬上擲筆、拍抬，怒視我。😡😡

我知他下一步就係入房，自己冷靜。幸好我還趕得及馬上Active Listen 他的情緒，說：「你係咪好嬲媽咪咁樣話你？」他咀一扁，眼淚盈眶，走了進房。

我就在他門外說：「Sorry, 我知你嬲我咁話你。你ready, 就來搵媽咪！」

我平靜地回房，因為類似上述情景常常發生。過了不夠10分鐘，他回來跟我說：「係囉，你次次幫我默書都criticize 我，我唔鍾意囉。」（情緒平服了）

細心回想自己上次同上次，好似都有一邊默一邊說一些「呢個字唔啱..」等説話。他似乎真的說得對，我有點兒內疚，就問：「你覺得我一邊幫您默書，一邊批評你，令到您覺得好annoying 。 」

「係呀，你就係又話呢個唔啱，果個唔啱。」他模彷我的語氣和表情！（原來又真係幾討厭！😜）

「sorry, 我唔知道你咁唔鍾意，不過有時真係有啲錯處我好想指出，咁我應該點樣同你講，你先覺得舒服啲？」

「可以學我d 老師咁，即係我寫完哂，如果錯咗，你就喺隔離寫番一個啱嘅比我睇，但係唔·好·講·嘢。」🤭🤭

他的建議我有點兒未能接受，所以我說：「你d老師真係唔講嘢㗎？不過我要show 比你睇d正確筆順，因為有時見你調亂咗。」（我都要向他表明我的要求。）

他說：「ok 呀！我會睇住你寫，然後唔出聲咁寫番你睇。」

這個我可以接受，於是我説：「好！咁如果你又寫錯左，咁我就又唔出聲再示範一次俾你睇係咪？」

「係！」

「Ok 咁我地再默過啦！」

他馬上拿回紙筆，說：「其實我唔係唔識個”於”字....」他的心情已回復正常水平，開始解釋，而大家也可以繼續默書！

「沉默是金」，先閉上咀巴、是這類開始愛面子的男孩喜歡的應對方法，我們切忌囉囌、挑剔。

上述例子其實蘊含「父母効能訓練」課程上一些技巧，而最終的解決方法不是父母控制或有任何讓步，而是能夠滿足父母和孩子的需求，雙方都能夠接受的。

#父母効能訓練

#MamaCoachHongKong

#家長教練

#GordonParenting

#轉換法