點樣可以唔俾腦細知你請假去見工？

點樣可以唔俾腦細知你請假去見工？
.
最高超嘅呃人技巧，星爺其實教過，就係要呃人，首先要呃到自己。不過首先你要了解自己到底想唔想俾腦細知！因為哩個問題，其實同你嘅目的同策略有非常之大嘅關係。
.
可能你會問，點解要俾腦細知你請假去見工？因為你目的係想要佢知道，你對份工或者現時嘅工作崗位有不滿，甚至係喺工作上或者人事上遇到好大嘅困難，憑你一己之力係解決唔到，從而需要尋求一份新嘅工作去突破現狀。與此同時，你亦深信你腦細知道咗你想轉工之後，佢係會有進一步幫你解決問題，包括加你人工、幫你調職等等，否則基本上你未必會想你腦細知你有轉工嘅心態，除非你想你成功 Last Day 之前就開始被人唾棄、被人玩、被人安排豬頭骨嘅工作。當然，亦有另一種原因，就係你根本係抱住 「I don’t freaking care（idfc）」 嘅心情，哩種就完全係遇神殺神，遇佛殺佛嘅 Mode，所有野都阻唔到你離開公司，完完全全係如入無人之境。
.
之但係講係咁講，事實上又有幾多打工仔係有如此嘅境界同造詣？做左幾十年嘅 Old Seafood 當然會有哩種境界，但係哩啲人都唔會郁下就話走啦。所以絕大部分嘅打工仔，甚至係你自己，就算想加人工都「唔會」直接搵腦細開波，話你覺得份人工唔夠，然後威脅佢「唔加人工，就預無咗一個優秀嘅員工」；反而會係好似情侶咁，私底下搵到個水泡先，再同個正印攤牌，話哂都叫有個後備丫嘛，有咩事起上黎，個正印真係唔要你，都仲有個水泡做住兵先。
.
係咪發覺同你自己好似呢？每次搵工都要偷偷摸摸，請假都唔想請得咁明顯，以防被人發現你有轉工嘅心。但到底點樣先可以不留痕跡，不留消息地請假都無人知你去見工？哩樣野就要由你平時嘅習慣入手！首先，你要營造一種「唔知點樣用你嘅假期」嘅感覺，簡單啲，姐係平時非不必要都唔拎假，然後累積多少少嘅假期，最好就等腦細提一提你「仲有好多假期，係時候要清一清啦」。
.
建基於「唔知點樣用你嘅假期」哩種感覺，跟住就係要逐日逐日拎假，就算你唔係見工，最好拎假嘅時候，都係一日一日咁拎，建議都係先放喺禮拜五，或者係禮拜一，連埋禮拜六、日可以 3 日 3 日咁放，令人覺得你唔想拎長假，但又要清一清假嘅感覺。當然，你亦可以隔幾個禮拜又放下禮拜二、三或者四，不過要俾人一種訊息，就係你並唔係去見工，而純粹只係覺得工作太辛苦，一個禮拜返 4 日工已經係你嘅極限。
.
仲有一點，就係平時唔好請咁多病假，就算你真係病咗，定抑或係真係累趴了，想搵個籍口免費逗住人工咁放下假，建議都係唔好利用病假。一來，要造就一種感覺，就係你心繫公司，就算病都係掛住你嘅工作；二來，就係現今病假實在俾人一種射波嘅感覺，所以盡量要令人覺得你同平時係無咩大分別。隱藏自己嘅本意，就係哩次行動最大嘅目標。
.
基本上只要你做到上面所講嘅，同埋做到「若要人不知，唔好太低 B」，自己唔傻傻地爆響口俾啲所謂「信得過」嘅同事嘅話，你應該可以成功避開「請假 = 見工」嘅觀念。
.
不過其實要實行到哩一步，諗返都有啲悲哀。點解唔可以平白地講出自己對公司嘅不滿？純粹只係怕食豬頭骨？怕被人歧視？怕要解釋？而小編採取嘅方法就係反其道而行。唔係 Idfc 嘅心態，亦唔係天不怕地不怕，純粹只係小編係一個直腸直肚嘅人，有嗰句就講嗰句。

by 0o HR扮工週記 o0